तारपा नृत्य

वारली चित्रपट्टीतील तारपा नृत्य

वारली आदिवासी जनजातीचे हे पारंपरिक नृत्य आहे.तारपा हे गारुड्याच्या पुंगीसारखे असणारे वाद्य वाजविणारा वादक जेव्हा आपली लय बदलतो त्यावेळी या नृत्याची लयही बदलते असे या नृत्याचे स्वरूप आहे.

दादरा आणि नगरहवेली प्रांतातील वारली आदिवासींमध्ये हे नृत्य विशेष प्रचलित आहे.

तारपा वाद्य

तारपा हे वाद्य नारनदेव या देवतेने वारली जनजातीला दिले अशी या जनजातीत समजूत प्रचलित आहे.वाळवलेल्या भोपळ्यापासून हे वाद्य तयार करतात.

सादरीकरण

भाद्रपद वद्य द्वादशीच्या आसपास तांदुळाचे नवीन पीक हाती यायला लागल्यावर हे नृत्य सामान्यपणे केले जाते.या नृत्याचा शेतीशी व सुगीच्या आनंदाशी संबंध मानला जातो . सामान्यतः रात्रीच्या जेवणानंतर हे नृत्य केले जाते.यामध्ये मध्यभागी तारपा वादक असून त्याच्याभोवती पुरुष वर्तुळात नाचतात.त्या वर्तुळाच्या बाहेर महिला एकमेकींच्या कमरेत हात घालून आणखी एक वर्तुळ करून नाचतात.